Capa nasagmuyo ni Purisima

CEBU, Philippines - Pormal nang milingkod sa iyang katungdanan kagahapon sa buntag diha sa Police Regional Office-7 si Senior Superintendent Conrad Capa ug mideretso kini og report ngadto ni Chief Superintendent Danilo Constantino.

Si Capa maoy pangulo sa Task Force Tugis nga nakadakop sa mga high-profile fugitives sama kang Delfin Lee kinsa gipasanginlang utok sa multi-billion pesos housing scam.

Si Capa gihatagan og higayon ni Constantino nga makatubag sa mga pangutana sa mga tigbalita ug kini miingon nga “excited” siya sa iyang bag-ong assignment apan niangkon kini nga nasagmuyo siya ni PNP Director General Alan Purisima.

Gibutyag ni Capa nga reassignment ang gihatag kaniya karon sukwahi sa gipasiatab sa PNP chief nga promosyon. Daw nasagmuyo siya nga ikatulo lang siya nga opisyal sa rehiyon sunod sa regional director ug sa deputy regional director for administration.

Hinuon ang nahisgutang opisyal miingon nga iyang tahuron ang desisyon sa  iyang labaw tungod kay daku siya og respeto ni Purisima.

Sa iyang bahin, si Purisima nga nahinabi sa mga media sa kaulohan miingon nga kinahanglan nga modala og usa ka dako nga katungdanan ang mga opisyal una pa sila ma-promote.

Nanghinaot si Capa nga dili lang unta siya magdugay sa iyang pagkadestino sa Sugbo ug mipasiaw kini nga pwede ra siya nga mopabilin sa Sugbo kung siya na ang mamahimong regional director. (BANAT NEWS)