Duha napusilan atol sa buy bust operation
CEBU, Philippines - Gipamusil ug gipanigbas ang mga polis nga nagpahigayon og buy bust operation batok sa managsuong gidudahang ‘pushers’ diha sa Barangay Jugan, lungsod sa Consolacion sa miaging gabii.
Nadakpan hinuon ang tulo ka suspek apan duha kanila napusilan sa mga polis nga giilang sila si Vilmar Capasin, 20 , ug igsuon nilang babaye nga si Jinky,22, samtang nadakpan si Leover,19.
Si Vilmar gikatahong nakuhaan og kalibre 45 pistola sa mga polis human sa hitabo.
Si PO1 Socrates Borinaga sa kapolisan sa maong lungsod mibutyag nga usa ka buy bust operation ang gihimo sa grupo ni Senior Inspector Franco Rodolfh Oriol.
Matud pa ni Borinaga nga ang ilang police decoy nga si PO1 Julius Patac nipalit og tulo ka paketeng shabu kang Leover, apan dihang iyaha na kining gidakop kalit nga migawas ang magulang lalaki niini nga si Vilmar nga nagdala og armas nga kalibre .45 ug namusil ngadto sa mga polis apan walay nangaigo sa mga awtoridad. Dihadiha mibawos sa pagpusil ang ilang kauban nga si PO2 Glenn Rosal nga nakaingon sa pagkaangol ni Vilmar sa tiyan.
Matud pa nga dihang ilaha na untang dad-on ang duha kalit usab nga mihamag ang babayeng igsuon sa mga suspek nga nagdala og sundang nga 53 pulgadas ug gitigbas si Patac nga nagpugong ni Leover apan swerteng wala makaigo.
Tungod niini napusilan ang maong babaye sa ulo ug talandugon karon ang kahimtang diha sa Vicente Sotto Memorial Medical Center uban ang iyang igsuong si Vilmar. (BANAT NEWS)
- Latest
