Gipahubo atubangan sa camera

CEBU, Philippines - Usa ka freelance photographer ang gidakop sa kapolisan sa gihimong entrapment operation samtang nagpahigayon og aktwal nga nude photoshoot human kini gireklamo sa 20-anyos niyang modelo nga pagpangilad.

Ang suspek nga si Jaypee Daarol Corilan, 28, residente sa Pusok, Lapu-Lapu  City giingong naaktuhan sa kapolisan sud sa usa ka lodging house sa sitio Sangi Road, Pajo dakbayan sa Lapu-Lapu City sa milabay’ng hapon nga nanguha og pictures sa reklamante.

Matud pa nila ni  Sr. Insp. Rogelio Pineda Jr. ug  Insp. Judith Besas sa Women’s and Children’s Desk sa kapolisan sa maong siyudad usa ka 20-anyos nga call center agent nga single-parent  ug residente sa Cogon-Ramos, Cebu City ang reklamante.

Sa imbestigasyon sa kapolisan ang biktima mitug-an nga nagkaila sila ni Corilan sa Facebook duha ka semana na ang milabay ug didto gikatahong gikombinser siya niini kung gusto ba kini mahimong modelo ug bayran og P25 mil kada session. Way pagduhaduha misugot ang biktima ug nagpakuha siya og hulagway kang Corilan nga way sapot niadtong Pebrero 12, 2014 apan gihatagan lamang siya niini og 150 pesos. Sa ikaduhang higayon nga gihangyo na usab siya nga pahuboon og usab sa dakong kantidad apan wala na mosugot niini ang biktima apan giingong gihulga siya ni Corilan nga i-upload ang iyang mga hubo nga hulagway sa internet.

Tungod sa kahadlok, midangop ang biktima sa kapolisan hinungdan sa gihimong entrapment operation diin nagpakaaron-ingnon ang biktima nga misugot sa gustong ipabuhat kaniya sa suspek.

Sud sa maong lodging house nadakpan si Corilan samtang nagsugod na ang ilang pictorial session.

Nakuha gikan ni Corilan ang usa ka camera, videocam, laptop ug usa ka USB nga dunay sud nga mga malaw-ay nga hulagway.

Si Mayor Paz Radaza mipadayag sa iyang kalipay sa pagkasikop ni Corilan ug nagpasalamat sa biktima sa kooperasyon niini. (BANAT NEWS)