Tommy wala na g’yuy cancer

CEBU, Philippines -  Hingpit na g’yud ang kaayohan ni kanhi mayor Tomas R. Osmeña kay gani giingnan siya sa iyang mga doktor sa M. D. Andersons Cancer Center sa Houston, Texas nga kausa na lang sa matag tuig siya mohimo og subli nga check-up.

Si Osmeña mitug-an nga molarga na siya balik dinhi sa Sugbo karong adlawa human sa pipila ka adlaw nga pagsuroy-suroy didto sa Los Angeles, California human sa iyang check-up sa miaging semana.

Ang mga doktor ni Osmeña miawhag unta kaniya nga magpahiling kaduha matag tuig apan sanglit ilang nakita nga wala na’y kanser ang kanhi mayor sa dakbayan sa Sugbo, giawhag na lang si Osmeña nga kausa na lang sa mata’g tuig magpahiling.

Si Osmeña nagpatambal sa M. D. Andersons Cancer Center kaniadtong 2008 dihang namatud-an nga nakasinati siya og kanser sa iyang pantog.

Ang kanhi mayor misubli-subli sa pag-ingon nga milagro ni Senyor Santo Niño ang iyang kaluwasan tungod kay kaliboan ka tawo nga iyang mga dumadapig sa politika nag-ampo nga siya maluwas sa sakit.

Matud ni Osmeña nga dugay ra siya nga nakabantay nga wala na siya’y kanser human  sa pagpailawom kaniya og chemotherapy sa makadaghan nga higayon.

Ang chemotherapy usa ka moderno nga paagi aron pagpatay sa kagaw sa kanser nga mianam-anam pagkutkot sa lawas sa usa ka tawo.

Si Konsehal Margarita “Margot” Osmeña nga asawa sa kanhi mayor nalipay kaayo sa resulta sa medical check-up nga nagpakita nga wala na g’yud ang kanser sa iyang bana.  (BANAT NEWS)