Mga armado’ng tawo sa Lorega gipangdakop

CEBU, Philippines -  Duha ka lalaki nga naghupot og mga armas ug may tanom pa nga marijuana nasikop sa mga sakop sa Cebu City Intelligence Branch (CIB) didto sa Barangay Lorega-San Miguel kaniadtong Lunes sa gabii.

Ang nadakpan mao si Lester Ablay, alyas Opaw, 21, molupyo sa Barangay San Roque-Ciudad, dakbayan sa Sugbo ug si Fermin Singh Cui, 60, molupyo sa maong lugar.

Si Superintendent Reycel Carmelo Dayon, deputy city director for operations, miingon nga ang suspetsado gialarma sa iyang mga silingan.

Nakadawat og tawag ang kapolisan nga adunay tawo nga armado sa maong dapit mao nga girespondehan dayon sa mga polis ang Lorega-San Miguel.

Nasakmit gikan ni Ablay ang usa ka kalibre .45 nga pistola nga may pito ka bala samtang nakuha usab sa balay ni Cui ang laing kalibre .45 nga pistola nga may pito ka bala, ug duha ka kaang nga may tanom nga marijuana.

Matud sa kapolisan nga nagtuo sila nga ang marijuana alang lang sa personal nga gamit sa mga suspetsado.

Ang mga dinakpan gitanggong karon sa Cebu City Police Office (CCPO) stockade samtang giandaman og kaso nga ipasaka batok kanila.  (BANAT NEWS)