‘Nanulis’ sa LBC gisikop

CEBU, Philippines -  Usa ka lalaki nga gitudlo nga apil sa mitulis sa LBC Taboan Branch gidakop sa mga polis didto sa Barangay Mambaling kaniadtong Lunes sa gabii.

Si Jerome Gonzaga, 25, nga taga Sitio Alaska, Mambaling giingong sakop sa Bobby Buro Gang. Ang iyang kauban nga si Bernabe Buro alyas Bobby ug giingong lider sa gang nakaikyas.

Sumala pa ni Supt. Reycel Carmelo Dayon, deputy city director for operation, nga positibong gitudlo si Gonzaga ni Danessa Zafra nga maoy mitulis sa LBC niadtong Marso 10.

Matud ni Dayon nga ang pagkasikop ni Gonzaga nahimo tungod sa pagtabang sa mga tawo nga mihatag kanila og kasayuran. Si Kapitan Abrahan Desamparado sa Barangay San Nicolas Proper miingon nga isip amahan sa barangay naninguha usab siya nga masulbad ang tulis nga nahitabo sa LBC Taboan Branch nga sakop sa iyang teritoryo.

Ang hepe sa Sawang Calero Police Station nga si Chuck Barandog miingon nga sa ilang imbestigasyon nasuta nga si Gonzaga ug Buro ang responsabli sa maong tulis.

Dihang si Zafra miila g’yud ni Gonzaga base sa hulagway giadto dayon sa kapolisan ang gipuy-an ni Gonzaga apan si Buro wala na didto.

Nakuha sa kapolisan gikan kang Gonzaga ang usa ka KG-9 nga mga machine pistol, nga may 25 ka bala, duha ka kalibre .45 nga may 7 ka bala nga gi-abandonar ni Buro dihang nakit-an niya ang kapolisan.

Matud ni Dayon nga posibling may mga kauban pa si Buro gawas ni Gonzaga ug ang ilang pagkasikop dako’g ikatabang sa kasulbaran sa pipila ka tulis. (BANAT NEWS)