Mga hepe sa kapolisan gitawag ni Romana

CEBU, Philippines - Tungod sa sunod-sunod nga tulis ug lungkab nga nahitabo sa Sugbo gipatawag kagahapong adlawa sa direktor sa Cebu City Police Office (CCPO) ang tanang hepe sa lainlaing police stations dinhi sa dakbayan.

Si Senior Superintendent Noli Romana buot masayod kun unsay problema nga nasugatan sa mga hepe sa kapolisan nga makabalda sa ilang serbisyo aron kapangitaan kini og sulbad.

Nakabantay si Romana nga misiaw ang pagpanglungkab ug pagpanulis sa milabay nga mga adlaw ug gusto niya nga mahunong na kining mao nga krimen.

Lakip sa tulis nga nahitabo mao ang sa LBC Forwarder sa Taboan, ang lungkab sa Western Union sa Osmeña Boulevard, tulis sa payroll money sa Alliance Hardware sa Barangay San Roque ug ang Botikang Pinoy Pharmacy sa miaging adlaw.

Matud pa ni Romana nga ilang nahisgutan ang mga problema nga ilang nasugatan ug miangkon ang pipila niya ka hepe nga ang kakuwang sa gidaghanon sa ilang mga sakop ug kakuwang sa kagamitan maoy nag-una nila nga problema.

Si Romana miingon nga iyang gitun-an ang posibilidad nga idestino sa mga police stations ang mga polis nga kasamtangang nadestino sa headquarters sa Cebu City Police Office.

Lakip sa nakita ni Romana nga problema mao nga ang ubang mga polis walay kalibotan sa krimen nga nahitabo sa iyang palibot.

Matud ni Romana nga kasagaran nga mga polis nga gi-assign sa beat patrol mga bag-o pa nga mao ra sa’y gibantayan sa mga kriminal.

Si Romana miingon nga magpahigayon ‘sab sila og usa ka “simulation exercise” sa Oplan Universe aron makita niya kun unsaon sa kapolisan pagrespondi sa usa ka alarma.

Lakip na sa problema nga natan-awan ni Romana nga posible nga nagmonitor ‘sab diay ang mga kriminal sa ilang UHF Radio Frequency sa pagdistino sa kapolisan sa checkpoints aron dili sila madakpan.

Nahukman ni Romana nga usbon ang ilang deployment sa labing daling panahon ug tun-an pa niya kun unsay angay niyang buhaton.

Apan nangayo ‘sab si Romana og tabang sa publiko tungod kay ang katawhan maoy mas nakahibalo sa mga badlongon sa ilang palibot. (/RUB)(BANAT NEWS)