Kawatan nailhan tungod sa Rayban nga nahabilin

CEBU, Philippines - Magsoon nga Bol-anon nga nagtrabaho sa Mactan Export Processing Zone (MEPZ) nabiktima sa pagpangawat dihang gilungkab ang gipuy-an nila nga balay didto sa Paknaan, Mandaue.

Ang wala hiilhi nga kawatan misulod pinaagi sa paglungkab sa gipuy-an nila ni Divina Cristine Arnado ug Robert Arnado, lumad nga taga Bohol.

Si PO2  Richard Ares, sakop sa Presinto 3 sa Mandaue City Police Office (MCPO), miingon nga nanglakaw ang mga biktima ug gikandadohan lang ang ilang gipuy-an nga balay.

Sa pagpauli sa magsoon, ilang namatikdan nga nakatag na ang mga butang sa ilang gipuy-an nga klaro kaayo nga gipang-ukay sa mga kawatan.

Nasuta sa magsoon nga nahanaw na ang ilang tablet, duha ka cellphone ug ubang mga sapot apan nakakaplag usab sila og Rayban nga gituohan nga iya sa kawatan nga nahabilin. Pinaagi sa Rayban, nailhan sa mga biktima ang kawatan nga usa nila ka silingan nga nailhan nga Jaymar.

Ang kapolisan miadto sa balay ni Jaymar apan ang suspek kaadlawon pa kini nga milakaw. (/RUB)(BANAT NEWS)