Tulisan mihunghong ra sa iyang pagpanulis

CEBU, Philippines - Nag-internet nga dalagita didto sa Sitio Palm Hills, Barangay Basak, Dakbayan sa Mandaue gisulod og wala mailhi nga tulisan kaniadtong Domingo sa gabii ug gitulis. Apan kay ang biktima nga si Vinez Taneo wala may daghan’g kwarta, gikuha sa tulisan ang iyang cellphone dayong sibat gikan sa mao nga balay-patigayon.

Si Taneo, 16, taga Purok Tundan, Barangay Basak, mitug-an sa kapolisan nga ang nagtulis kaniya nagsul-ob og lubos itom nga t-shirt ug karsones. Gibana-bana kini nga kapin sa 20 ang pangedaron.

Si PO2  Richard Ares sa kapolisan sa Presinto 3 sa Mandaue City Police Office (MCPO) miingon nga namatikdan sa internet attendant ang pagsulod sa wala hiilhing lalaki ug miduol kini sa dalagita nga kustomer nga nag-internet.

Gitoohan nga higala sa dalagita ang maong tawo kay miduol man nga ingon sa adunay gihunghong ug wala lang makita nga gitionan diay sa tulisan og armas ang biktima.

Ang biktima miingon nga ang gidala niya nga kuwarta igo ra g’yud ibayad sa internet.

Ang tulisan adunay kauban nga nagpaabot lang luwan sa usa ka motor didto sa gawas ug abtik nga mipasirit paingon sa direksyon sa Consolacion dihang nakaangkas na kaniya ang nanulis. (/RUB)(BANAT NEWS)