Barko nga muangkorahe sa kadagatan pabayron

CEBU, Philippines - Ang pangulo sa Bantay Dagat Task Force misugyot nga pabayron ngadto sa dakbayan sa Sugbo ang tagdumala sa mga barko nga muangkorahe sa kadagatan dinhi sa siyudad.

Si Ranulfo Sebusa, executive director sa Bantay Dagat Task Force, miingon nga daghan kaayo nga mga barko nga mag-angkorahe sa kadagatan sa dakbayan.

Gipasabot ni Sebusa nga mas labing maayo nga pabayron kining mao nga mga barko kay hayan mamilegro pa ang kadagatan kun magpataka sila og paagas sa ginamit nila nga oil.

Si Sebusa, kanhi koronel sa Maritime Police nga nadistino dinhi sa Sugbo, nagplano nga mopadangat siya niining mao nga sugyot ngadto ni Konsehal Nida Cabrera. Gibutyag ni Sebusa sa miaging semana nga nagtipun-og na ang mga basura nga anaa ilawom sa kadagatan dapit sa Barangay Sawang Calero paingon na sa kanhi Kawit Island nga kabahin na karon sa South Road Properties (SRP).

Matud ni Sebusa nga ang makolekta unya nga bayad gikan sa tagdumala og mga barko nga muangkorahe sa kadagatan dinhi sa dakbayan mahimong gamiton pagpa-limpyo sa dagat nga napuno na sa basura ang kinahiladman. (BANAT NEWS)