Sakyanan naugdaw sa Fuente Rotunda

CEBU, Philippines - Nasunog ang usa ka pribadong sakyanan sa Fuente Osmeña Circle sa dakbayan sa Sugbo tungod sa electrical wiring sa battery niini.

“Mura’g kani gyud diri (wire) sa battery kay kalit man ni diri nga niinit niya nahibulong ko kay naa naman murag kayo. Murag ning ground gyud (wire),” matud ni Jose Tan, drayber sa maong sakynan samtang gitudlo niya sa Banat News ang maong kable.

Ang sakyanan gipanag-iya sa Cebu Atlantic Hardware. Si Tan kauban ang iyang walo ka laing kauban paingon na uli sa ilang panimalay gikan sa ilang gitrabahoan.

Matud ni Tan ang iyang kaubanan sa trabaho nga si Leah Del Rosario kinsa naglingkod sa atubangan kalit nga nakasinati og kainit sa lingkuranan.

“Nakabantay siya murag nanginit. Hapit gud masunog iyang sinena. Wala ra man hinuoy nasamad,” niingon siya.

Pagkabantay nila nga aduna nay kayo, dali silang nigawas sa sakyanan ug nidagan palayo niini. Dali sab dayong niresponde ang kabomberohan.

Kadiyot ra hinuon naaberya ang trapiko sanglit dali ra kaayong nangabot ang mga awtoridad pagdirekta sa trapiko. - /EIM (BANAT NEWS)