DPWH awhagon nga dili dunganon ang proyekto

CEBU, Philippines - Si Mayor Jonas Cortes miawhag sa katawhan sa dakbayan sa Mandaue nga magpailob lang sila kun ilang masinati ang problema sa trapiko tungod sa pagsemento sa mga karsada nga gihimo sa Department of Public Works and Highways (DPWH).

 Ang problema sa trapiko sa Mandaue nagumikan kay gidungan-dungan sa DPWH ang pagsemento sa ubay-ubay’ng national road apil ang mga karsada nga sagad anha moagi ang mga sakyanan.

Gikataho nga ang pagsemento sa mao nga mga karsada molanat pa og usa ka tuig usa makompleto sa paghuman. Daghang mga motorista ang nagbagulbol kay kanunay sila nga malangan sa ilang biyahe tungod sa kahuot sa mga sakyanan.

Matud ni Cortes nga angay’ng sabton lang sa katawhan tungod kay proyekto kini sa nasudnong kagamhanan nga gitumong aron sa pagpanindot sa mga karsada nasyonal nga nahimutang sa dakbayan.

Apil sa mga karsada nga sementohon mao ang A.C. Cortes Avenue sa Ibabao; Ouano Avenue sa Reclamation Area, dalan Plaridel  sa Alang-Alang, dalan A.S. Fortuna sa Banilad, dalan M.L. Quezon sa Maguikay, dalan M.C. Briones sa Subangdaku,  Jose Rizal Avenue sa Paknaan,  North Coastal Highway sa Umapad ug Paknaan. Gikabalak-an nga mograbe ang problema sa trapiko sa Mandaue ilabi na kun moabot na ang pagsaulog sa tinuig nga pangilin karong Mayo 8.

Laing dakong kalihukan alang sa tinuig nga pangilin sa dakbayan mao ang pagpahigayon sa Panagtagbo Festival nga sugdan sa pagpahigayon og street dancing sa matag contingent gikan sa 27 ka barangay sa dakbayan.

Samtang si Bise Mayor Glenn Bercede  miingon nga mohimo sila sa konseho og resolusyon nga mag-awhag sa DPWH 7 nga sa sunod tuig dili na nila dungan-dunganon ang paghimo og proyekto sa ubay-ubay’ng kadalanan aron dili makamugna og problema.

Gipasabot ni Bercede nga samtang nindot ang tumong sa DPWH nga pag-atiman sa mga karsada nasyonal apan kun ilang dunganon pagpatuman ang proyekto makamugna sila og kahasol sa mga motorista ug sa katawhan.  (BANAT NEWS)