Mga PUJ drayber sa Mandaue nasagmuyo

CEBU, Philippines - Nasagmuyo kaayo ang mga drayber og passenger jeepney sa dakbayan sa Mandaue nga giwagtang na ang opisina sa Land Transportation Office (LTO)-7 sa Barangay Subangdaku nga adto ra unta sila makaparehestro sa mga sakyanan nga pasaheroan.

Nahukman sa kadagkoan sa LTO nga ang pagpangrehestro sa mga “For-Hire vehicles” ibalik na sa ilang regional office sa Natalio Bacalso Avenue apan ang pagkuha og Motor Vehicle Inspection Service (MVIS) clearance adto gihapon kuhaa sa LTO-satellite office sa Subangdaku.

Si Romeo Armamento, presidente sa Mandaue United Driver’s Association-National Confederation of Transport-Worker’s  Alliance (MUDA-NCTA), nanglantaw nga dakung problema ang masinati tungod sa paghuot unya sa mga tawo nga mo-transact og business sa LTO regional office.

Matud ni LTO-7 Acting Regional Director Arnel Tancinco nga ang ilang mga opisyal didto sa kaulohan maoy mihukom nga ibalik na sa regional office ang pagpangrehestro sa mga “for hire vehicles” apil ang mga bag-ong sakyanan.

Si Armamento mipasabot nga ang pagbalhin sa transaksyon sa pagpangrehestro sa for-hire vehicles ug sa mga bag-ong sakyanan nga adto lang himoa sa LTO regional offices mosangpot kini og panagdasok sa mga tawo nga mohimo og trasaksyon matag adlaw.

Dugang ni Armamento nga dako unta ang bintaha alang kanila nga mga drayber ug operator nga gihiusa lang ang opisina nga morehestro sa mga for-hire vehicles ug sa MVIS.

Si Tancinco mipasabot nga ang personal computers nga gigamit didto sa satellite registration office sa Barangay Subangdaku gamiton nila sa LTO-7 regional office sa pagsugod na g’yud sa bag-ong sestima.   (BANAT NEWS)