Lalaki giluba sa kapuyo, maguwang gidunggab sab

CEBU, Philippines - Usa ka 43-anyos nga lalaki ang naangol human unaya sa pagdunggab sa iyang kapuyo niadtong Huwebes sa gabii diha sa barangay Biasong, dakbayan sa Talisay.

Ang biktimang si Antonio Qiapo, residente sa nahisgutang dapit kinsa nakaangkon og samad dinunggaban sa dughan daling gidala ngadto sa Talisay City District Hospital apan gibalhin kini ngadto sa Vicente Sotto Memorial Medical Center.

Ang suspetsadong kapuyo sa biktima nga si Michelle Gomez, 33, residente usab sa maong lugar daling misibat human sa insidente ug padayong gipangita sa kapolisan.

Si SPO1 Yvonne Illustrisimo nga nahinabi sa Banat News mibutyag nga giingong magsige og away ang biktima ug suspetsado apan wala mahibaw-i kung unsay hinungdan sa punay nila og away.

Sa wala pa mahitabo ang pagpanunggab ang duha giingong nadunggang naglalis na usab kini ug taliwala sa ilang panaglalis mikuha si Gomez og kutsilyo ug gihansak ngadto kang Qiapo.

Samtang kritikal ang usa ka maguwang human kini gidunggab sa iyang manghod tunga-tunga sa mainiton nilang panaglalis sa miaging gabii sa White Road sa barangay Inayawan sa dakbayan sa Sugbo.

Ang gidunggab naila nga si Basilio Rebecca, 34, samtang ang suspetsado naila nga si Dionesio Rebecca, 27, nga molupyo sa nahisgutang lugar.

Base sa imbestigasyon sa Homicide Section sa Cebu City Police Office ang pagpanunggab nahitabo sa sulod sa balay sa biktima, gisusi pa sa kapolisan kung unsay giawayan sa duha. Ang biktima gidala sa Cebu City Medical Center samtang ang suspek nasikop sa Pardo Police nga gipangulohan ni SPO1 Joel Lacson.

Narekober gikan sa suspek ang kutsilyo nga gigamit niini sa pagdunggab sa iyang maguwang.  Pasakaan og kasong frustrated murder ang suspek sa kapolisan apan nag-agad pa sila sa desisyon sa maguwang niini. (BANAT NEWS)