Puganteng ginang gibalhin na sa BJMP
CEBU, Philippines - Gitugyan na ngadto sa bilanggoan sa Bureau of Jail Management and Penology (BJMP) ang pugante nga babaye sa lungsod sa Consolacion nga nadakpan sa follow up operation sa kapolisan didto sa Barangay Gairan, dakbayan sa Bogo.
Ang pugante nga si Dionisia Lumantao, 38, nadakpan sa kapolisan sa lungsod sa Consolacion pinaagi sa warrant of arrest tungod sa kaso sa paghupot sa illegal nga drugas niadtong Marso 2 niining tuiga.
Nakaeskapo kini sa pagka Marso 3 diha sa detention cell samtang nagpatotoy sa iyang anak.
Si PO1 Michael Villardar miingon nga sila si PO1 Julius Patac ug PO2 Glenn Rosal maoy nakadakop kang Lumantao sa barangay Gairan, dakbayan sa Bogo samtang nag-atang kini og bus nga kasakyan alas 7 pasado ang takna sa gabii. Usa sa mga anak sa suspek maoy mitabang sa kapolisan nga madakpan kini pagbalik. (BANAT NEWS)
- Latest
