Lima ka adik nga kawani sa brgy Mabolo taktakon

CEBU, Philippines - Kadtong lima ka kawani sa Barangay Mabolo nga napositibo sa kinalit nga drug test, taktakon g’yud sa ilang serbisyo sa barangay.

Matud ni Kapitan Reynaldo Ompoc nga gikauyonan sa mga sakop sa Mabolo Barangay Council nga taktakon g’yud sa trabaho ang mao nga mga kawani.

Si Kapitan Ompoc miingon nga magsilbi kini nga mensahe sa mga opisyal sa Mabolo nga dili sila motugot nga adunay mga kawani sa barangay nga mogamit og illegal nga drugas.

Ang barangay kapitan maoy miawhag sa mga sakop sa City Office for Substance Abuse Prevention (COSAP) nga gipangulohan ni Alice Utlang nga himoan og kinalit nga drug test ang mga kawani sa barangay. Si Utlang miingon nga anaa ra g’yud sa mga opisyal ang paghukom kun unsay himoon nila sa ilang mga kawani nga mapositibo sa drug test.

Miabot na og 30 ka kawani sa barangay ang napositibo sa drug test human gihingusgan sa COSAP ang paghimo og kampanya nga mailhan ang mga adik nga empleyado. Wala lang hinoon ilha ni Kapitan Ompoc ang lima ka kawani nga taktakon sa trabaho human mapositibo sa paggamit og shabu.   (BANAT NEWS)