‘Smuggled items’ gisakmit

CEBU, Philippines - Usa ka establisamento ang gironda sa mga sakop sa Bureau of Customs-Cebu diha sa Purok Saluang, Sitio Kalubihan, Yati, Liloan nga miresulta sa pagkasakmit sa gidudahang mga gi-smuggle nga mga kontrabando.

Si BOC Commissioner John Sevilla mipadala og letter of authority nga gi-address kang Evelyn Quijano Alforque sa T.E.S Enterprises aron iimplimentar ang Section 2536 sa Tariff and Customs Code of the Philippines.

Gimandoan usab niini ang unom ka mga ahente sa BOC nga sakmiton ang maong mga butang kung dili sila makapakita og resibo nga nabayran nila ang buhis niini sa BOC. Si BOC-Cebu district collector Rolando Almadin  nagkanayon nga hangtud ning pagsulat sa balita wala pay napresentar nga dokumento si Alforque.

"Apparently, walay gipakita nga payment of taxes and duties," sumala pang Atty. Kenneth Kernn Sesante, BOC-Cebu chief of staff  kagahapon sa hapon samtang giimbentaryo ang mga gisakmit nga butang.

"Daku kaayo ang lugar unya daghan kaayo ang nakuha. Mao nang until now, sige pa ang inventory," dugang pang Sesante.

Base sa "After Operation Report" nga gisumiter sa mga ahente sa Customs Intelligence and Investigation Service-Port of Cebu  ngadto sa ilang officer-in charge nga si Arneth Von Carmen Manquiquis, nakuha diha sa compound ang  daghang ginamit na ug gi-chopchop nga Honda Fit nga awto, mga jet skis, speed boats, hand tractors, multicabs, used generator sets ug wala pa matinong gidaghanon sa  surplus nga pisa sa mga trak.

Sumala pa usab sa mao gihapong report nga ang “smuggled items” gipanag-iya kini ni Alforque ug gi- finance sa usa ka wala mailhing Hapon.

Sa pagsusi sa BIR Business Permit, ang pangalan ni Alforque  maoy nakarehistrong tag-iya sa maong establisamento.

Subay sa Section 2536 (seizure of other articles) , ang Commissioner of Customs and Collector of Customs o bisan kinsang customs officer,  basta dunay  awtorisasyon sa Commissioner, mahimong mo- demanda og resibo sa pagbayad sa mga buhis  sa mga imported nga butang nga gibaligya o ba kaha gitagoan.         

  Kung di makapakita niini mahimong sakmiton ang maong mga butang ug ipailawom sa forfeiture proceedings.  (BANAT NEWS)