Amerikano nga milubag sa bukton sa SWAT dili na ikiha
CEBU, Philippines - Kadtong Amerikano nga milubag sa kamot ug mipatid pa g’yud sa usa ka sakop sa Special Weapons and Tactics (SWAT) posibleng i-deport sa Amerika kay dili na lang siya pasakaan og kaso.
Si Michael Steven Croteau, 35, nga taga Texas, United States gipasakaan unta og kasong Direct Assault tungod kay mipatid kini ug misuway’g lubag sa bukton ni PO3 Juliver Soque.
Apan tungod sa gipakitang linihokan sa langyaw dihang gidakop siya sa kapolisan gidala dayon ang Amerikano sa psychiatric ward sa Vicente Sotto Memorial Medical Center.
Nasuta nga ang maong langyaw nakasinati og psychotic disorder o diperensya sa pangisip basi sa medical certificate nga gi-isyu ni Dr. Renato Obra.
Girekomendar ni Dr. Obra nga patambalan ang langyaw tungod kay isog pa man kaayo ang maong tawo nga may sinyales sa Psychosis.
Tungod sa findings sa doktor wala na lang gipadayon sa kapolisan ang pagpasaka og kaso nga Direct Assault batok sa langyaw.
Human unya nga mapatambalan si Croteau mahimo na kini nga ipadeport balik sa United States. (BANAT NEWS)
- Latest
