800 metric tons nga bugas gidonar sa China
CEBU, Philippines - Nagpasalamat ang National Food Authority, Department of Agriculture ug Department of Social Welfare and Development sa China tungod sa ilang donasyong 800 metriko toneladang bugas alang sa mga biktima sa kalamidad sa Cebu ug Bohol.
Sa ceremonial turnover sa donasyon, si DSWD-7 regional director Mercedita Jabagat mipasalig nga madawat gyud sa mga benepisyaryo ang maong bugas.
Samtang si DA undersecretary ug chief-of-staff Bernadette Romulo-Puyat nagkanayon nga ang maong bugas miabot og 16,000 ka bags. Dinhi usab kuhaon ang 10,000 ka bags nga ihatag ngadto sa Loon, Bohol ug ang sobra 6,000 alang na sa mga biktima sa bagyong Yolanda sa Northern Cebu.
Ang mga opisyal sa maong mga ahensya sa gobiyerno gikuyogan ang representante sa China Ministry of Agriculture ug ASEAN Plus Three Emergency Rice Reserve (APTERR) ngadto sa Daanbantayan aron i- turnover ang 900 ka bags nga bugas.
Si Cebu Fourth District Representative Benhur Salimbanagon kinsa wa makatambong sa turnover ceremony apan gipresentahan sa iyang chief of staff nga si Jojie Decal miingon nga dako og matabang sa iyang distrito ang maong mga bugas.
Samtang si APTERR general manager Nongnoch Deetae nagkanayon nga ang ubang ASEAN countries misaad usab og kapin 6,000 metric tons nga bugas alang sa mga nabiktima sa kalamidad dinhi sa Central Visayas. Midugang si Jabagat nga sukad pa sa miaging tuig, ang gobiyerno sa China mihatag og hinabang sa mga biktima sa linog ug sa bagyo.
Si Ye Anping, ang direktor sa International Cooperation, Ministry of Agriculture of China nanghinaot nga makabarog na sa labing daling panahon ang mga biktima sa bagyong Yolanda. (BANAT NEWS)
- Latest
