Duha ka bata gihapsa’g kahoy sa may kakulian sa pangisip

CEBU, Philippines - Nakaangkon og grabeng bun-og sa ilang lawas ang duha ka mga menor de edad human giingong gihapsan og dos-por-dos nga kahoy sa usa ka ex-convict nga giingong may problema sa pangisip niadtong Huwebes sa alas 9:00 sa buntag sa  milabay’ng semana diha sa barangay Tabunok, dakbayan sa Talisay.

Ang suspetsado kinsa nasikop sa mga polis ug napasakaan og kasong frustrated murder niadtong milabay’ng Lunes mao si Roxin Canasa, 31, taga sitio Nonoc, barangay Tabunok, dakbayan sa Talisay. Ang mga biktima nag-edad og 14-anyos ug 13-anyos nga taga Jaclupan,  ug  Linao, Talisay City giingong mga libud-suroy. Ang duha uban sa ilang mga inahan nga mi-report diha sa Talisay City Women and Children Protection Desk (WCPD).

Sa imbestigasyon nila ni PO3 Violeta Godinez ug PO2 Rechel Abellanosa ang duha ka mga bata parehong natulog daplin sa usa ka tindahan sa Tabunok dihang giingong gipusposan sila og kahoy sa suspetsado ug ang 13-anyos nakuyapan ug diha na nakamata sa tambalanan.

Matud pa nga ang 14-anyos maoy unang gipusposan sa bukobuko ug daling mibarog ug mikaratel og dagan ug nangayo og tabang, matud pa niya nakit-an niya ang suspek nga gihapsan ang ulo sa 13-anyos nga natulog pa nianang tungora. Ang duha ka bata daling gidala ngadto sa tambalanan tungod sa mga bun-og sa ilang mga lawas ug samad sa ilang ulo. Si Abellanosa nga nahinabi sa Banat News mibutyag nga ang paryente sa suspetsado mitug-an kanila nga napriso kini ngadto sa Muntinlupa sulod sa 12 ka tuig ug nakagawas kini sa milabay’ng usa ka tuig.

Giingong duna na kini deperensiya sa pangisip ug nasulod na kini sa mental hospital nganhi sa Sugbo apan gipagawas kini tungod kay naulian man apan permanente gihapong manghasi sa iyang inahan ug manion og kutsilyo bisan wala hilabti. (BANAT NEWS)