Women’s Month sa Mandaue

CEBU, Philippines -  Si Mandaue City Mayor Jonas Cortes miawhag sa kababayen-an sa 27 ka barangay sa dakbayan nga maghugpong aron magkahiusa sila pagmugna og kalamboan.

Ang pamahayag giluwatan ni Mayor Cortes atul sa pagbukas sa Women’s Month Celebration kaniadtong Lunes diin matud sa mayor nga ang kababayen-an angay’ng pasidunggan.

Matud ni Cortes nga daghan na karon ang kalampusan sa atong kababayen-an sa natad sa panarbaho, negosyo ug bisan na sa atong mga magbabalaod diin daghan ang mga babaye.

Ang pagsaulog sa buwan sa kababayen-an sa Mandaue gipangulohan sa asawa sa mayor nga si Sarah Cortes nga maoy nagdumala sa Gender Awareness and Development (GAD) sa dakbayan.

Mitambong usab sila si Violeta Cavada, Social Welfare head sa dakbayan ug Assistant Regional Director Nemia Antipala  sa Department of Social Welfare and Development (DSWD).

Si GAD focal person Pureza Tabuac nagpahibalo nga sa matag adlaw nga kalihokan naglakip kini sa symposium on Magna Carta of Women unya sa Marso 22 ug culmination sa Women’s Summit karong Marso 28.  (BANAT NEWS)