Manag-agaw sa Argao gikaligo’g bala patay
CEBU, Philippines - Lalaki nga nagpatuktok sa iyang manok gipusil patay samtang ang ig-agaw niini gipusil patay sab sa mga lalaki nga nagsakay og motor pasado alas 6:00 sa miaging gabii sa barangay Tinaan sa dakbayan sa Naga.
Ang mga namatay naila nga si Lito Pañares, 44, ug ang ig-agaw niini nga si Ronie Pañares, 48, pulos molupyo sa nahisgotan nga lugar.
Base sa imbestigasyon sa kapolisan nga ang biktima nga si Lito nagpatuktok sa iyang manok ug ang iyang ig-agaw nga si Ronie naglingkod sa rattan nga duyan dihang miabot ang duha ka lalaki nga nagsakay og motor.
Mihunong ang maong mga lalaki ug miduol kini ni Lito ug mitira sa makadaghan sa biktima hinungdan sa pagkatumba niini sa yuta.
Misulay unta og tabang si Ronie ngadto kang Lito apan gipusil sab siya sa mga killers hinungdan nga namatay kini diha-diha dayon.
Dihang miresponde ang kapolisan narekober gikan sa crime scene ang pito ka kabhang sa kalibre .45 ug usa ka slug niini.
Si SPO3 Ian Quitayin, desk officer nga nahinabi sa Banat News mibutyag nga duna na silay mga suspek nga gitan-aw ug ang maong mga suspek nalambigit sa illegal nga drugas ug gun-for-hire business.
Apan gitan-aw pa sa kapolisan kun unsay motibo sa pagpatay sa mga biktima. Sumala pa ni Quitayin nga napagan lang si Ronie kay nagtuo silang si Lito lang gyud unta ang tumong sa maong mga lalaki. “Misignal ang usa, ang usa ka suspect nisyagit apila lang,†sumala pa ni Quitayin. (BANAT NEWS)
- Latest
