‘Nipalusot’ og hot logs gipabuhian
CEBU, Philippines - Unom ka tawong giingong nagdala og mga illegal lumber sa dakbayan sa Talisay gipabuhian niadtong Huwebes sa gabii tungod kay wala kini mapasakai og kaso.
Si Talisay City Administrator John Yre De los Reyes nga nahinabi sa Banat News kagahapon mibutyag nga gikonsulta niya ngadto kang city legal counsel Alfredo Sipalay ang maong problema.
Matud ni De los Reyes nga si Sipalay mipasabot nga ang boat captain nga si Danilo Lampad ug ang mga tripulante nga sila si Nesan Lampad, Felix Lampad, Ronil Balbareno, Junior Gelsano ug Rolando Angcob dili pwedeng maditener sulod sa 24-oras tungod kay walay kaso nga mapasaka batok kanila.
Kahinumduman nga ang unom kinsa giingong nagkarga og mga illegal lumbers ang gigukod sa mga Special Warfare Group (SWAG) niadtong Miyerkules sa kaadlawon ug giingong mipakanaog kini sa mga kahoy diha sa sitio Aromahan sa barangay Dumlog. Apan ang maong mga suspetsado mihimakak kini sa pasangil batok kanila ug nangangkong mamalit sila og hugaw sa hayop aron himuong abuno.
Apan nagkabailos ang mga rason sa mga suspetsado diin dihang gisukit-sukit sila ni De los Reyes nangangkon na usab kining mamalit og ammonium nitrate aron himuong abuno apan walay napakitang dokumento o permit nga nagtugot nga makapalit sila sa maong kemikal nga sagol usab sa paghimo og eksplosibo.
Matud ni De los Reyes nga si Sipalay mipasabot nga wala maaktohi ang mga suspetsado nga nagdiskarga og ilegal nga lumber hinungdan nga walay kasong mapasaka batok kanila apan ang ilang mga bangka gi-hold kini sa kagamhanan sa siyudad samtang ang mga kahoy gitugyan kini ngadto sa Department of Environment and Natural Resources (DENR).
Giklaro ni De los Reyes nga diha sa buhatan lang sa Fishermen Sea and Ecological Care (FISECA) nila gipapundo ang mga suspetsado dili diha sa detention cell. (BANAT NEWS)
- Latest
