Patay’ng lawas gitoohang gi-salvage

CEBU, Philippines - Napalgan sa usa ka mananagat ang naglutaw nga patay’ng lawas sa usa ka lalaki didto sa kadagatan sa Barangay Tangke, dakbayan sa Talisay kagahapon sa udto.

Wala dayon mailhi ang patay’ng lawas nga nagsul-ob og itom nga jacket, blue nga t-shirt, ug basketball jersey nga purol kolor itom ug yellow.

Base sa imbestigasyon sa kapolisan nga si Arturo Laboca maoy nakakaplag sa patay’ng lawas alas 11:25 kagahapon. Gidala ni Laboca ang patay’ng lawas ngadto sa opisina sa Fisheries Sea Ecological Care (Fiseca).

Paghiling sa kapolisan nasuta nga ang lawas sa maong tawo naputos sa samad pinusilan. May samad kini sa iyang dughan, wala nga bahin sa iyang lawas, wala nga kamot, ug tuo nga pulso.

Nakita usab nga ang lawas adunay patik sa iyang wala nga paa nga “JN Egot” ug ang dughan sa biktima may patik usab nga Rosalsa Saguba.

Gidala ang maong biktima sa Saint Francis Funeral Homes alang sa post mortem examination. 

Gituohan nga hayan dili taga Barangay Tangke ang biktima tungod kay wala man g’yud kini mailhi sa mga residente sa maong lugar.

Samtang usa ka lolo napalgan ‘sab nga patay na didto sa sapa sa Sitio Gaang, Barangay Lamesa, Balamban kaniadtong Domingo sa buntag.

Ang 68-anyos nga si Diosdado Presbitero gikatahong adunay diperensya sa pangisip ug naglibod-suroy lang sa maong lugar.

Gikataho nga sukad pa niadtong petsa 4 nga walay kaon si Presbitero ug napalgan na lang kini nga patay na.  (BANAT NEWS)