Terror attack sa China natiktikan na sa Taiwan

CEBU, Philippines - Gibutyag sa usa ka opisyal sa Taiwan nga duna sila’y mga nadawat nga mga warning sa posibleng pag-atake sa mga terorista diha sa China atol sa tinuig nga parliamentary session.

Ang National Security Bureau head nga si Tsai De-sheng mitug-an sa ilang legislative committee niadtong Lunes nga nakadawat sila og impormasyon niadtong Marso 4 kabahin sa maong pag-atake.

Ang target sa mga terorista mao ang mga dagkong tugpahanan ug mga subway stations sama sa Beijing Airport.

Ang Chinese National People's Congress karong tuiga gihimo niadtong Marso 5. Tulo ka adlaw sa dili pa ang maong panagtigom dihang giatake sa mga kalalakin-ang armado og kutsilyo ang mga pasahero sa railway station sa Kunming, China, nga miresulta sa kamatayon sa 30 ka tawo ug kapin usa ka gatos ang nangaangol.

Tungod sa maong hulga gipahugtan sa Taiwan ang ilang seguridad ilabi na niadtong mga abyon gikan sa Beijing.

Samtang giklaro niya nga ang impormasyong ilang nadawat wa maghisgot kabahin sa nahitabo sa Malaysian Airlines nga padung sa Beijing Airport nga dunay kapin usa ka gatos ka Chinese nga pasahero. (BANAT NEWS)