Tulo ka transport groups nagkasabot nga ipatuman ang pletihang nasabotan sa 2011

CEBU, Philippines - Tulo ka transport groups sa Cebu ang mopasaka og petisyon alang sa implimentasyon sa kaniadto naaprubahang pletihan sa mga bus pasaheroan sa Land Transportation Franchising and Regulatory Board niadtong tuig 2011.

Ang mosang-at sa petisyon mao ang Cebu Provincial Bus Operators Association, Cebu South Mini-bus Operators Association ug North and South Operators Association, karong adlawa gikatakdang magtigom ang grupo aron planuhon pa ang ilang petisyon.

Si Julieto Flores, kinsa maoy gihimong tigpamaba sa grupo nga ilang nasabotang tulo ka grupo nga mo-file og petisyon aron ma-reinstate ang naaprubahang petisyon.

Sa pagkakaron, ang mga bus operators  mosingil lang og P6  sa unang lima ka kilometro ug P1.20 kada mosunod nga kilometro. Nahimo kini tungod sa grabeng kompetisyon.

Apan ang orihinal nga giaprubahan sa LTFRB P8.50 sa unang lima ka kilometro ug P1.45 sa mosunod nga mga kilometro.  (BANAT NEWS)