Sen. Cayetano midayeg sa mga babayeng polis

CEBU, Philippines - Mibisita sa Sugbo si Senador Pia Cayetano nga namulong kabahin sa gender equality ug misaksi sa paghatag og pasidungog sa unom ka policewomen nga gipasidunggan sa rehiyon kagahapong adlawa.

Ang gipasidunggan naglangkob nila ni Sr. Insp. Marilou Cuizon, sa Regional Police Community Relations tungod sa iyang pagpahigayon sa Family Juvenile and Gender Sensitivity Programs nga nakadawat sa Medalya ng Kasanayan.

Samtang nakadawat sab sa maong medalya si Insp. Margienett Yosores sa Cebu City Provincial Police Office tungod sa kalamposan pagpugong ug pagsulbad sa kriminalidad   pinaagi sa “community-oriented” nga mga kalihokan.

Nakadawat og Medalya ng Kagitingan si Insp Sheryl Bautista sa Regional Intelligence Division tungod sa kalamposan sa kampanya batok sa human trafficking.

Nakadawat sab og Medalya ng Papuri si Insp. Jeciree Saquilabon sa Negros Oriental Police Provincial Office tungod sa iyang natampo sa pagpugong ug  pagsulbad sa kriminalidad isip labaw sa Women’s and Children’s Protection Desk sa maong buhatan.

Nakadawat na sab og laing pasidungog ang Ten Outstanding Policewomen of the Philippines nga si Insp. Arieza Otida ug si SPO1 Ruth Violango tungod kay garbo ang duha sa kapolisan.

Matud ni Cayetano nga ang mga babaye nga sama kanila dunay dakong papel sa “nation-building.” Matud sa senador nga iyang gipasalamatan ang mga policewomen tungod sa ilang nabuhat sa nasud.  (BANAT NEWS)