Money forwarder gitulis

CEBU, Philippines - Dul-an P50 mil ang nasakiyo sa duha ka lalaki nga mitulis sa LBC Taboan Branch kagahapon sa alas 12:42 sa udto, ang maong pagpanulis nahitabo wala pay usa ka semana human gitulis usab ang lain pa nilang branch sa barangay Tabok sa Mandaue City.

Si Danessa Safra, ang nag-inusarang empleyado sa maong branch nga nahinabi sa mga tigbalita miingon nga pasado alas 12:00 samtang siya nag-atiman sa  duha ka kustomer mikalit lang nga dunay misulod nga usa ka lalaki nga nagsul-ob og yellow nga sinina.

Ang maong lalaki mitan-aw usa sa mga kustomer ug miduol sa usa ka lalaki nga kustomer nga si Reynaldo dayon mibunot sa iyang revolver ug gitionan kini.

Gimandoan sa lalaking nagkalo ug nag-shades nga paadtoon sa kilid sulod sa cubicle sa teller si Pagadoan ug ang babaye nga customer nga si Girly Caballero, 42.

Human niini misulod na usab ang laing lalaki nga nagsuot gihapon og yellow  t-shirt ug nagkalo dayon milingkod kini sa lingkoranan sa teller ug mimando kini nga isulod ang kwarta sa iyang bag.

Misugo pa kini sa teller nga paablihan ang vault ug ipasulod ang mga kwarta niini. Human sa maong hitabo milakaw ang duha.

Si Sr. Insp. Chuck Barandog ang hepe sa Taboan Police Station miingon nga giatol sa mga tulisan nga naniudto ang polis nga iyang gidestino sa maong lugar.

Sumala pa ni Barandog nga usbon na sad niya ang iyang deployment plan aron mapugngan ang susamang hitabo sa iyang area of responsibility. Matud pa nga milanat lang og duha ka minutos ang maong pagpanulis base sa kuha sa CCTV.

Midugang si Barandog nga ang maong tulis maoy labing unang higayon nga may gitulis nga establisamento sa iyang hurisdiksyon isip hepe sa usa ka presinto dinhi sa Sugbo.

Padayon pa ang iyang imbestigasyon sa maong tulis ug mihangyo kini nga hatagan og kopya sa kuha sa CCTV footage sa maong buhatan apan gibalibaran siya sa empleyado tungod kay kinahanglan pa kini og pagtugot gikan sa ilang manager.  (BANAT NEWS)