Nagpalit og pan gipareglahan, gidunggab

CEBU, Philippines - Lisud karon ang kahimtang sa 20-anyos nga lalaki nga gipareglahan pagdunggab didto sa Sitio Aroma, Barangay Subangdaku, dakbayan sa Mandaue lapas sa alas sayes kagahapon sa buntag.

Ang biktima mao si Marly Pepito, ulitawo nga nagpuyo gihapon sa Sitio Aroma samtang  ang midunggab kaniya nailhan lang sa angga nga Jojo nga giingong estambay lang sa maong lugar.

Si SPO1 Michael Limalima, sakop sa Presinto 2 sa Mandaue City Police Office (MCPO) miingon nga naglakaw lang ang biktima aron mopalit unta og pan sa usa ka bakery dihang giduol sa suspek.

Gidunggab unta ang biktima sa iyang dughan apan nakalihay ug mao nga sa ilawom sa iyang ilok kini maigo.

Ang suspek nga si Jojo dali nga misibat samtang ang biktima dali nga gidala sa Mandaue City Hospital apan gibalhin kini sa Vicente Sotto Memorial Medical Center sa dakbayan sa Sugbo. (/RUB)(BANAT NEWS)