Papa mipatay sa ex-lover sa anak

CEBU, Philippines - Gipusil patay sa usa ka amahan ang kanhi kapuyo sa iyang anak human kini misulong sa ilang balay aron makig-estorya ug makigbalik sa iyang anak pasado alas 6:00 sa miaging hapon sa dalan Adelfa sa barangay Tisa sa dakbayan sa Sugbo.

Ang biktima naila nga si Jericho Principe, 24, molupyo sa sitio Mojon sa samang barangay. Samtang ang nakapusil kaniya mao si Nilo Ferrer, 44, usa ka security guard. Base sa imbestigasyon sa kapolisan nga ang biktima miadto sa balay ni Ferrer aron makigbalik sa anak sa suspek nga si Marinel.

Gikatahong isog kaayo ang biktima nga miadto sa balay sa mga Ferrer ug misuway kini sa pagsulod sa balay aron pugson pagkuha ang anak sa suspek.

Sumala pa sa suspek nga dili siya mosugot nga kuhaon og balik ni Principe ang iyang anak tungod kay iya man kining dapatan.

Dugang pa sa suspek nga nahinabi sa Banat News/ The Freeman nga duha ka tuig nga nag live-in ang iyang anak ug si Principe apan permi niining dapatan ug hulgaon ang iyang anak ilabi na kun makasuyop kini og ginadiling drugas.

Apan niadtong gabhiona, giangkon sa suspek nga nahurot na ang iyang pailob tungod kay mibahad man kini nga pamatyon sila kun di makigbalik ang iyang anak. Dihadiha iya kining gipusil aron lang unta motagam apan naantimano man hinuon kini sa walang bahin sa lawas ug patay na pag-abot sa Cebu City Medical Center. Ang suspek nasikop sa mga sakop sa Punta Police didto sa dalan Duterte sa barangay Guadalupe nga ilang gihangyo nga motahan na lang sa kapolisan aron dili modako ang iyang kaso. Mag-atubang og kasong homicide ang maong amahan sumala pa sa kapolisan. (/EIM)(BANAT NEWS)