Museyo alang sa ‘Takas sa Talisay’ gitinguha

CEBU, Philippines - Ang kagamhanan sa dakbayan sa Talisay mihangyo kang Gobernador Hilario Davide, III sa pag-imbitar sa United States Armed Forces pinaagi sa embahada sa Estados Unidos nganhi sa nasud nga magbutang og interactive museum sa dakbayan sa Talisay nga dunay kalambigitan sa kasaysayan sa pagdunggo sa American Liberation Forces kaniadto sa kabaybayonan sa siyudad. Si Konsehal Doroteo Emit, chairman sa committee on tourism and heritage mipalabang og resolusyon niadtong Martes sa maong hangyo.

Matud ni Emit nga ang “landing” sa mga sundalong Amerikano sa siyudad niadtong World War II maoy usa sa hinungdan sa liberasyon sa tibuok probinsiya sa Sugbo gikan sa mga Hapon.

Gipasabot ni Emit sa milabay’ng pito ka dekada nagkaanam-anam na og kawagtang ang interes ug kahibalo sa publiko sa maong mahinungdanong kasaysayan.

Ang interactive museum isipon sa Talisay nga pagyukbo ngadto sa mga sundalong Amerikano ug Filipino nga misakripisyo sa ilang kinabuhi alang sa atong kagawasan karon lakip usab ang mga sundalong Hapones kinsa mibuhis usab sa ilang kinabuhi niadtong WWII sa ngalan sa ilang nasud.

Nunot niini, laing resolusyon ang gipalabang ni Emit niadto gihapong Martes nga naghangyo kang Commodore Reynaldo Yoma, commander sa Naval Forces Central (NAVFORCEN) sa pag-deploy og barko sa dili pa ug atol sa kasaulogan sa Takas sa Talisay o Talisay Landing karong Marso 26, 2014.

Sumala pa ni Emit kinahanglang paninduton pa ang himuong selebrasyon ug reenactment aron mas hangpon ug hatagan pa og importansiya sa mga Talisaynon ang ilang kasaysayan.

Dugang ni Emit nga ang presensiya unya sa mga barko makapaaghat usab kini sa mga lokal ug foreign tourists sa pagbisita sa lugar atol sa kasaulogan sa Talisay Landing. - /EIM (BANAT NEWS)