Misibat sa checkpoint nadakpan gihapon

CEBU, Philippines - Gitanggong karon sa kapolisan ang duha ka lalaki human madakpi kay misuway unta pag-ikyas sa gipahigayong police checkpoint didto sa dalan A.S. Fortuna, dakbayan sa Mandaue kagahapon sa kaadlawon.

Ang mga dinakpan mao sila si Justin Lunanoc, 19, ug kauban nga si Nover Añabisa, 18, pulos ulitawo ug taga Barangay Banilad, dakbayan sa Sugbo. Nagsakay sila og motorsiklo nga gimaneho ni Lunanoc apan pagkakita nila sa nag-checkpoint nga mga polis abtik kaayo nga milihay ang duha aron dili maharang sa mga polis.

Ang kapolisan nga gipangulohan ni Inspector Rey delos Reyes abtik nga migukod sa motorsiklo ug misangpot sa pagkasikop sa duha. Nahibaw-an nga wala diay lisensya si Lunanoc ug expire usab ang rehistro sa motor. Nangatarungan si Lunanoc nga ang motorsiklo gihuwaman ra nila sa iyang kaklase. Ang multa sa pagmaneho og motor nga expire ang rehistro P4,000 ug laing P1,500 sa pagmaneho og sakyanan nga walay lisensya. - /RUB (BANAT NEWS)