UV graduate topnoTcher sa LET
CEBU, Philippines - Usa ka gradwado sa University of the Visayas (UV) apil sa unom ka Sugboanon nga nahimong topnotcher sa Licensure Examination for Teachers (LET) nga gipahigayon kaniadtong Enero 26.
Si Kristine Myrene Rose Sayre nakahuman sa iyang pagtungha sa UV Main sa dalan Colon ug nabutang sa ika-siyam nga dapit sa iyang average nga 86.20. Ang laing Sugboanon nga nakakuha sa ika-upat nga dapit sa elementary level mao sila si Pauly Mariz Recio sa Cebu Normal University ug si Rica Alessandra Young sa Cebu Technological University-Main nga nakakuha og average nga 87.
Samtang sila si Mary Kenth Aceret sa University of Cebu (UC) ug si Jasson Singculan sa UCLM ang nakakuha sa ika-walo nga dapit nga may average nga 86.40.
Sa Secondary level nga pasulit nakuha ni Carla Mae Sumalinog sa University of San Carlos (USC) ang ika-napulo nga lugar sa iyang average nga 86.20.
Matud pa sa website sa Professional Regulations Commission (PRC) nga gikan sa 38,377 ka tawo nga mikuha og LET ang 11,120 lang kanila ang nakapasar sa elementary level samtang sa 42,358 nga mikuha sa secondary level 12,033 lang ang nakapasar.
Samtang sa lain nga pasulit nakuha ni Dexter Nuevo sa University of San Carlos ang ika-upat nga dapit sa Electronics Engineering nga Board Exam sa iyang average nga 84.70.
Matud sa PRC nga 907 lang ang mipasar sa Electronics Engineer Licensure Examination gikan sa 2,574 ka mga tawo nga mikuha sa maong eksaminasyon. - /RUB (BANAT NEWS)
- Latest
