Polis ug laing 3 ka tawo nangamatay

CEBU, Philippines - Upat ka tawo, apil ang usa ka polis, ang napalgang patay sa managlahing dapit sa Sugbo kaniadtong miaging Huwebes.

Si SPO2 Alejandro Jarina, 53, nga nadistino sa Firearms Explosives Security Service Agency and Guards Supervisory Section (FESSAGS), padulong na unta nga motrabaho dihang giatake sa kasing-kasing.

Nagmaneho si Jarina sa iyang motorsiklo apan kalit kini nga mipadaplin ug nanaug, dayon nangayo og tabang sa mga tawo duol sa Barangay Hall sa Carreta.

Ang traffic enforcer nga si Nercita Otero daling mitawag og Emergency Rescue Unit Foundation (ERUF) midala ni SPO2 Jarina sa ospital apan gideklarar nga patay na ang polis.

Sa laing bahin, patay na usab nga napalgan ang babaye nga si Sandy Rojas, 37,  nga anha lang magkatulganan sa aseras sa dalan J. Llorente, Barangay Capitol Site, sa dakbayan sa Sugbo.

Base sa imbestigasyon sa kapolisan nga si Rojas napalgan na lang nga wala nay panimuot sa iyang kapuyo nga konduktor.  Ang miresponde nga paramedics sa Emergency Rescue Unit Foundation (ERUF) mibutyag nga patay na ang babaye.

Wala’y nakita nga timailhan nga gituyo ang iyang kamatayon apan gihimoan gihapon kini og post mortem examination.

Samtang nagbitay nang napalgan sa iyang mga silingan si Ivan Aliño, 28, molupyo sa Upper Calajo-an, Minglanilla.

Matud pa nga si Aliño napalgan na lang kini nga nagbitay sa iyang kwarto nga ang liog gihigtan og alambre sa kuryenti.

Dihang gidala si Aliño sa Minglanilla District Hospital gideklarar kini sa mga doktor nga dead on arrival.

Samtang patay usab ang usa ka kawani og hardware nga napalgan sa iyang inahan nga nagbitay usab kini sa iyang kwarto didto sa lungsod sa Asturias kagahapon sa buntag.

Ang giingong naghikog mao si Luke Carl Rom Lingawlingaw, 25, taga Poblacion, Tabuelan.

Matud pa ni PO2 Jose Niño Villaceran nga gipukaw unta sa iyang inahan si Lingawlingaw apan mao na lay nakit-an niini nga nagbitay na kini sa pisi.

Matud ni Villaceran nga ang inahan sa namatay mibutyag nga katulo na kini masulod sa mental hospital tungod sa depresyon ug padayon pa kining nagtumar sa iyang tambal.

Kaduha na usab kini nagsuway pagpakamatay.  -/RUB (BANAT NEWS)