Katungod sa kababayen-an nga makatrabaho

CEBU, Philippines - Gikinahanglan ang dugang livelihood ug training program alang sa kababayen-an aron dili madani sa "cyber prostitution" sumala pa ni Lapu-Lapu City Mayor Paz Radaza atol sa iyang pakigpulong sa "Women’s Month Celebration" karong bulana.

Matud pa ni Radaza, patas na ang babaye ug lalake karong panahona gikan sa politika hangtud na sa negosyo ug ang uban mao na gani ang breadwinner sa pamilya.

Apan gibutyag niya daghan pang mga kababayen-an ang way desenteng panginabuhian mao nga mudangop sila sa illegal nga paagi. Daghan nang kababayen-an ang  nangadakpan tungod sa drugs, prostitusyon ug ning bag-o cyber pornography.

Giawhag ni Radaza ang DepEd nga iapil sa leksyon ang dautang epekto sa cyber prostitution isip pamaagi nga malikay ang kabataan ug mutabang sa gobiyerno nga masumpo kini.

"I enjoin you to help me in this fight against cyber prostitution. I urged educators, civil society and church groups to please work together to strengthen value formation," panawagan pa sa mayor.

Samtang sa Cebu City Police Office, si PO2 Nora Geramis sa Women’s and Children’s Protection Desk miingon nga ang kababayen-an maoy kahayag sa panimalay maong kinahanglan ilang panalipdan ang ilang katungod aron ilang mahimo ang ilang papel sa pamilya.

Gibutyag ni Geramis nga niadtong miaging tuig grabe ang pagsaka sa mga kaso sa pag-abuso sa kababayen-an.

Sa tuig 2012, dunay natala nga 381 ka kaso diha sa WCPD ug hapit kini mi-triple sa tuig 2013 kay miabot og 863 ka mga kaso, hinuon daling gipasabot ni Geramis nga maong misaka kini tungod kay giapil na nila sa ihap ang mga kasong nasang-at diha sa mga barangay. Si PNP Director General Alan Purisima di pa lang dugay mimando nga ipakita sa katawhan ang  “true crime picture” sa nasud pinaagi sa paglista sa tanang natala nga krimen apil ang naa sa mga barangay sa ilang crime incidence reports.

Ang  kinadaghanan nga kaso sa pagpangabuso mao ang pagpangulata og mga babaye diin sa tuig 2012, 340 ka kaso ug sa tuig 2013 miabot kini og 755 ka kaso. Menus hinuon ang mga reklamo sa pagluib sa maong mga tuig.

Giawhag karon sa kapolisan ang kababayen-an nga mosumbong dayon sa mga awtoridad kun sila giabusohan. - /EIM (BANAT NEWS)