Upat ka sunog miigo sa Iloilo ug Negros

CEBU, Philippines - Tulo ka mga lawak-saringan ug laing duha ka balay ang naugdaw sa duha ka sunog nga miigo sa Iloilo City niadtong Miyerkules sa gabii  ug kagahapon sa buntag. Ang sunog nagsugod sa La Paz National High School, sumala pa ni Fire Supt. Jerry Candido, ang Bureau of Fire Protection (BFP) 6 directorial staff chief ug acting city fire marshal  nga usa ka wall fan sa usa sa mga lawak ang mi-overheat ug misiga nga nakaingon sa sunog.

Dali kining mikatap sa mga kasikbit nga lawak sa Annex B Building ug nagbilin P900,000 nga danyos.

Samtang duha usab ka balay ang naugdaw sa Zone 8, Brgy. Calumpang, Molo  nga gipanag-iya sa managsuong Jorge Estrellan  ug Regen.

Sumala pang Candido nagduda silang “short circuit” sa electrical wiring  ang hinungdan niini tungod kay base sa nakuha nilang pamahayag misiga kalit ang luag nga plug nga gipaslakan sa electric fan sa balay ni Regen. Ang asawa ni Regen nga si Maricel, 36, nakaangkon og mga paso sa mga bukton ug nawong samtang nasamad usab  sa iyang kumagko si John Rey Batiller, 21.

Laing sunog usab ang gialarma  kagahapon sa hapon diha sa Barangay Q. Abeto, Mandurriao human misiga ang kural nga ginama sa kawayan dihang naabtan sa nagbaga nga uling, hinuon dali kining napawong.

Mipasidaan si Candido sa publiko nga mag-amping sa pagsaksak sa ilang mga appliances tungod kay mao kini sagad karon nga hinungdan sa mga sunog.

Samtang usa ka  lumber yard naugdaw sa Lopez Jaena, Poinsettia St., Brgy. 31, Bacolod City niadtong Huwebes sa gabii ug nagbilin og P2 milyones nga danyos.

Sumala pa sa Bureau of Fire Protection (BFP) ang nasunog mao ang Bacolod Mabuhay Lumber Yard nga gipanag-iya sa usa ka Steven Sy. Ang sunog gikatahong nagsugod sa bodega sa maong establisamento apan wala pa matino kung unsay sinugdanan niini. – Gikan sa The Freeman/EIM (BANAT NEWS)