Walo sikop sa drug bust

CEBU, Philippines - Walo ka tawo ang nasikop sa kapolisan ug sakop sa Philippine Drug Enforcement Agency sa managlahing anti-illegal drugs operations dinhi sa lalawigan sa Sugbo.

Sa lungsod sa Balamban, ang kapolisan ug PDEA misikop sa usa ka drayber sa habal-habal ug magtiayong taga Negros atol sa buy-bust operation kagahapon sa kaadlawon.

Ang nasikop naila nga si Leonardo Capol, 45, taga Bayong, Balamban, nga mitunol sa P1,000 nga balor sa marijuana ngadto sa usa ka ahente sa PDEA.

Nasikop sab sila si John Derek Cerbito, 23, ug Rosa Cerbito, 21, nga taga Hinigaran, Negros Occidental human nakuhaan og 12.5 kilos nga pinaugang marijuana.

Si Mark Maramba sa PDEA-7 nga nahinabi sa Banat News miingon nga si Capol mibaligya ngadto kanila og marijuana hinungdan nga gisikop kini. Apan atol sa operasyon, diha usab ang magtiayon nga Cerbito ug gidudahang namalit usab og pinaugang marijuana.

Matud pa ni Maramba, duha na ka semana nilang gipanid-an si Capol tungod kay nakadawat sila og taho sa illegal nga kalihokan sa tulo. Si Capol kusganong mihimakak nga namaligya kini og marijuana kay drayber ra gyud siya og habal-habal.

Apan si Rosa Cerbito matud pa sa desk officer sa Balamban Police Station nga si PO1 Bryle Villaban, nagdanguygnoy og hilak tungod kay nasikop na man hinuon kini imbes nga mogradwar na sa pag-eskwela karong bulana.

Sumala ni Villaban nga ang halin sa pagpamaligya sa magtiayon og marijuana maoy gigasto sa pag-eskwela niini.

Sa laing operasyon, nasikop sa kapolisan ang duha ka babaye apan nakaipsot ang usa ka lalaki nga ilang kauban sa buy bust operation nga gihimo sa barangay Binlod sa lungsod sa Argao sa miaging hapon. Ang nasikop naila nga sila si Marmebee De los Reyes, 32, ug si Debralyn Archita, 30, nga mga molupyo sa nahisgotan nga lugar, samtang nakaipsot si Richie Tanquis.

Matud pa nga si Archita mismo ang mitunol sa polis sa duha ka pakete nga gituohang shabu hinungdan nga gisikop kini sa kapolisan. Narekober kanila ni Archita ang usa ka medium ug tulo ka gagmay nga pakete sa shabu.

Samtang si De los Reyes nakuhaan sab og duha ka pakete nga shabu, nga gituohang gikan kang Tanquis. Lakip sa nakuha ang mga drug paraphernalia, unom ka medium packs sa shabu ug siyam ka dagkong plastic  nga gigamit sa pagputos sa shabu.

Lain sab nga nadakpan sa kapolisan sa lungsod sa Tuburan mao si Ken Haryll Ruelan, 31, Christine Pantollano, 30, Garry Pontallano, 18, Cloyd Figeroa, 33, ug ang usa ka menor atol sa buy bust operation nga gihimo niini sa barangay Daanlungsod pasado alas 11:00 sa miaging gabii.

Narekober sa kapolisan ang 11 ka gagmay nga putos sa shabu ug ang usa ka medium sized nga putos nga shabu. Si Ruelan may pending nga warrant of arrest sa kaso nga pagpangawat. Ang mga nasikop natanggong karon sa Tuburan Police Station samtang giandam pa ang kaso nga ilang atubangon.  -/EIM (BANAT NEWS)