Interes sa PHL mopatigbabaw

CEBU, Philippines - Gipasalig sa Malacañang nga magpatigbabaw gihapon ang interes sa Pilipinas luyo niining nagpadayong  sabot-sabot nga dugangan pa ang “rotational presence” sa tropang Amerikano sa nasud.

Ang mga  opisyales sa depensa sa nasud wala mosalikway sa mga sugyot nga kinahanglang dugangan pa ang presensya sa mga sundalong Amerkano sa nasud aron makab-ot ang tinguha niining “minimum credible defense.”

Niining mga panahona, ang Pilipinas nag-atubang sa dakong hagit gikan sa China nga miangkon sa mga teritoryo niini diha sa West Philippine Sea (South China Sea).

Si Presidential Communications Operations Office (PCOO) Secretary Herminio Coloma Jr., miklaro niini dihang dunay nangutanang reporters sa press briefings kung matumban ba ang interes sa nasud.

Matud pang Coloma ang negosasyon mobase sa  kasamtangang mga kasabotan sa Pilipinas ug Amerika lakip niini ang Mutual Defense Treaty and Visiting Forces Agreement.  (BANAT NEWS)