Wanted sa kasong kidnapping nadakpan
CEBU, Philippines - Usa sa mga most wanted persons sa Region 6 nasikop pinaagi sa joint operation sa Criminal Investigation and Detection Group-7, Regional Intelligence Division, Provincial Intelligence Branch ug sa Minglanilla police kagahapon sa buntag sa Barangay Guindaruhan, Minglanilla.
Si Jerry “Toto†Bitoon, 50, taga-Aniway, Iloilo, matud pa nga 19 ka tuig nang nagtago-tago sa wala pa siya masikop diha sa usa ka cockfighting farm nga gipanag-iya sa usa ka langyaw diin siya nagtrabaho isip usa ka fighting cock handler sulod sa upat ka tuig.
Ang operatiba armado sa warrant or arrest sa kasong kidnapping for ransom nga giluwatan adtong March 20, 1996, dihang giaresto si Bitoon. Aduna siyay patong sa ulo nga P175,000.
Si Sr. Supt. Ritchie Posadas, CIDG-7 director, mibutyag nga usa ka semana nga gipanid-an si Bitoon sa wala pa kini sikopa.
Lakip si Bitoon sa gipasakaan og kasong kidnapping for ransom adtong 1995 human ingong gi-kidnap ang usa ka Chinese national sa Iloilo City. Siya miangkon nga adunay naabot sa ilang balay nga P20,000 nga iyang gigamit sa paglarga paingon sa Manila.
Gikan sa Manila milarga na usab siya paingon sa Barangay San Vicente, Bogo City dayon sa Minglanilla. Matud ni Posadas nga pangayuon pa nila ang opisyal nga report sa maong kaso sa buhatan sa Iloilo City aron sa pagsuta kung ang ubang kauban ni Bitoon gawasnon pa ba hangtod karon o konbiktado na. Apan matud ni Bitoon nga aduna siyay indirect nga partisipasyon sa maong kaso kay didto lang mihulam kaniya og armas ang maong grupo ug wala gyud siyay labot sa pag-kidnap sanglit kaila man usab niya ang mga miyembro niini.
“Ang grupo nanghulam sila og pusil nako kay duna man ko sa balay unya kaila nako,†matud niya.
“Kahibalo ko nga duna koy kaso nag-expect ko nga maingon ani pero akong atubangon akong problema,†matud pa niya. (BANAT NEWS)
- Latest
