Ex- konsehal na-buybust

CEBU, Philippines - Kanhi konsehal sa Barangay Paknaan, Mandaue nga giingong nahimo na nga drug pusher nadakpan sa buy-bust operation ug nasakmitan og daghang shabu.

Si Jonathan Dichos, 35, taga Barangay Paknaan nasikop sa mga sakop sa Regional Anti-Illegal Drugs Special Operation Task Group atol sa buy-bust operation didto sa Barangay Carreta, dakbayan sa Sugbo niadtong Miyerkules sa gabii.  Gidakop si Dichos human kini mitunol sa pakete sa shabu ngadto sa poseur buyer bugti sa P500 nga marked money. Human madakpi si Dichos, girekisa siya sa mga polis ug nakuha pa gayud ang usa ka gamay, duha ka medium-sized ug usa ka bultong pakete sa shabu nga ang tanan mokantidad og P30 mil.

Nasakmitan pa gayud si Dichos og gamay’ng timbangan nga sagad gamiton pagbaligya’g shabu, cellular phone, drug paraphernalia, P500 nga marked money, P1,500 nga gituohang halin pa sa gidiling drugas ug Yamaha motorcycle.

Ang mga nasakmit nga shabu gitugyan ngadto sa PNP Crime Laboratory Service (CLS)-7 aron kahimoan og chemical analysis.

Si Senior Inspector Hendrix Bancoleta mibutyag nga nakadawat sila og inpormasyon kabahin sa illegal nga kalihukan ni Dichos niadto pa nga miaging tuig ug dugay nila kini nga gipanid-an. Wala hinoon misukol si Dichos dihang gidakop na siya sa mga polis mga alas 6:30 sa gabii. Nahibaw-an nga gawas sa Mandaue, si Dichos duna ‘say mga kustomer sa dakbayan sa Sugbo ug sagad sa iyang mga baligyaan og shabu ang iya ra nga mga nailhan. Sa interview sa CCTN-47, si Dichos nanghimakak nga usa ka drug pusher apan iyang giangkon nga mogamit siya og illegal nga drugas. Matud ni Dichos nga adunay nagpaluyo sa iyang pagkasikop.

“Set up ra ni nga dakupa,” matud ni Dichos. Ang dinakpan anaa nagtingkagol sa Waterfront Police Station ug gikatakda nga pasakaan og kaso nga paglapas sa Section 5 sa RA 9165 kon Dangerous Drugs Acts. Walay pyansa alang sa mga madakpan sa pagpabaligya og shabu.  (BANAT NEWS)