Koleksyon sa OBO misaka

CEBU, Philippines - Misaka ang koleksyon sa Office of the Building Officials (OBO) sa dakbayan sa Sugbo kaniadtong miaging tuig kun itandi sa kantidad nga ilang nakolekta kaniadtong 2012.

Mao kini ang gitug-an ni Acting City Engineer Jose Marie Poblete kinsa nag-andam og report nga ipresentar niya sa mga reporters sa Cebu City Hall unya sa Lunes. Matud ni Poblete nga sa miaging tuig miabot og kapin sa P39.4 milyones ang koleksyon sa OBO atol sa pagdumala pa ni City Engineer Kenneth Carmelita Enriquez samtang kapin lang sa P36 milyones sa 2012.

Base sa talaan nagpakita nga ang labing daku nga koleksyon sa miaging tuig nga miabot og P25.3 milyones gikan kini sa building permit, gisundan sa occupancy permit nga subra sa P6 milyones samtang ang uban sa mechanical permit.

Kaniadtong 2011 ang kinatibuk-ang koleksyon sa OBO miabot lang og P27 milyones. Matud ni Poblete nga nagpasabot kini nga mas daghang building permit ang naaprobahan.

Wala usab hinoon matataw ni Poblete kun ang mao nga mga permit nga naaprobahan sa miaging tuig alang ba sa mga dagku kaayo nga building. Ang balaod naglatid nga kadtong magtukod og building gikinahanglan g’yud nga mokuha sila og permiso gikan sa OBO.   (BANAT NEWS)