Mga tanod sa Talisay gusto maka-PhilHealth
CEBU, Philippines - Ang napiling presidente sa mga hepe sa mga tanod sa 22 ka barangay sa dakbayan sa Talisay nanghinaot nga tumanon sa siyudad ang saad nga hatagan og benepisyo ang mga tanod sama sa PhilHealth ug hatagan og abogado kung makasuhan panahon sa paghigayon nila sa serbisyo diha sa barangay.
Si Enrique Bustillo nga supervisor sa mga gwardiya sa usa ka telephone company sa Talisay ug maoy kasamtangang hepe sa tanod sa barangay San Roque maoy napiling presidente sa mga hepe sa tanod sa kabarangayan sa Talisay atol sa ilang gipahigayong eleksiyon kagahapon.
Ang mga tanod maoy frontliner diha sa kabarangayan sa pagresponde ug pagsumpo sa mga krimen mao nga panghinaot ni Bustillo tumanon sa kagamhanan sa siyudad ang saad nga hatagan sila og medical assistance, health insurance ug abogado kung dunay mopasaka nila og kaso. Si Charles Basillote, coordinator sa mga tanod nagkanayon nga abagahon sa siyudad ang uniporme sa mga tanod aron dili maglahi-lahi ang uniporme kada barangay.
Matud ni Basillote nga ang tanang mga yangungo sa tanod napaabot na kini ngadto sa mayor ug si Mayor Johnny De los Reyes misaad sa paghatag og suporta. Ang kahugpongan sa hepe sa mga tanod gitawag kini og “Association of Barangay Tanod Chiefs†kon “ABTIC-Talisayâ€. (BANAT NEWS)
- Latest
