Mobisita unta og priso, nagdala’g shabu

CEBU, Philippines - Babaye nga mobisita unta sa iyang higala nga nabilanggo sa Mandaue City Jail napriso na usab hinoon kay pagrekisa kaniya nasakmitan usab siya og usa ka pakete nga shabu.

Si PO3 Nirsas Baay, sakop sa Presinto 5 sa Mandaue City Police Office (MCPO), miila sa dinakpan nga si Lolit Esconde Comayas, hingkod ang panuigon nga nagpuyo sa Barangay Looc, Mandaue.

Matud pa ni PO3 Baay nga si Comayas gitugyan ni Mandaue Jail Warden Gil Inopia human kini masakmiti og shabu sa pagrikisa nga gihimo kaniya.

Dugang pa ni PO3 Baay nga ang kasong kalapasan sa Section II, Article II sa Comprehensive Dangerous Drugs Act gipasaka kagahapon batok ni Comayas didto sa buhatan sa piskalya.

Si PO3 Baay miingon nga si Comayas hayan ibalhin sa Mandaue City Jail. (/RUB)(BANAT NEWS)