DENR misusi na sa Talisay landfill

CEBU, Philippines - Ang Department of Environment and Natural Resources Office (DENR)-7 nipadala og technical team aron pagsusi sa labayanan og basura nga gikatahong nibuga og methane gas.

Ang tigpamaba sa DENR-7 nga si Eddie Llamedo nagkanayon nga ang katuyuan sa nahisgutang technical team pag-adto sa Barangay Tapol syudad sa Talisay mao ang pagsusi sa kalapad sa kadaut mugna sa giingong methane gas gikan sa nagliundok nga basura.

Si Llamedo niingon nga ila usab nga gisuta kun hingpit bang gituman sa Talisay ang mga lagda nga gilatid sa Ecological Solid Waste Management Act sa pagtukod sa mao nga sanitary landfill.

Nasayran nga ang kapitan sa barangay Tapol nga si Kapitan Mary Ann Nolasco niingon nga may 70 na ka mga basurero ang namahawa tungod sa bagang aso gikan sa nasunog nga mga basura tungod sa kahadlok nga sila magkasakit. (/RUB)(BANAT NEWS)