Tangkal sa DVM napuno sa mga iro

CEBU, Philippines - Wala na’y mahimo pa ang mga sakop sa Department of Veterinary Medicines sa dakbayan sa Sugbo pagpanakop sa mga libudsuroy nga mga iro kay napuno na kaayo ang ilang mga tangkal ug wala na sila’y kabutangan.

Si Cebu City Veterinarian Pilar Romero miingon nga kapin sa 100 ka iro ang naghuot karon sa ilang mga tangkal tungod kay hilabihan kadaghang iro nga gipang-surrender sa ilang mga tag-iya ug nga dili na makabuhi pa sa ilang kahayopan.

Matud ni Dr. Romero nga wala ‘sab kaayo nakauyon sa mao nga mga iro aron ilang sagopon mao nga nagpunsisok ra kini sa ilang tangkal. Gipasabot ni Romero nga dili usab nila mahimong basta-basta na lang nga patyon ang mga iro. Ang balaod naglatid nga ang pagpatay sa mga iro, kadtong dili na gayud kapuslan, mao nga hatagan sila og injection nga pangkatulog ug aron mamatay ang mga iro nga dili sakit, pasubrahan ang gidaghanon sa anestisya nga i-injection kanila.

Si Vice Mayor Edgardo Labella miawhag ni Dr. Romero nga kampanyahan ang daghang iro nga naglibudsuroy karon sa lainlaing mga barangay kay daghan na ang napaakan.

Si Labella nagkanayon nga daghang mga kabus nga pamilya sa napaakan og iro ang midangop sa iyang opisina aron mangayo’g tabang alang sa libre nga injection og anti-rabies vaccine. Ang Department of Health (DOH) dunay libre nga anti-rabies vaccine alang sa una ug ikaduha nga pag-injection apan wala na’y libre nga tambal alang sa ikatulo.

Nagtoo si Labella nga mas daghan pa g’yud ang gidaghanon sa mga napaakan kun iapil kadtong mga kwartahan nga direkta ra nga nagpatambal sa pribado nga mga tambalanan.

Matud ni Romero nga gawas nga wala na sila’y kabutangan sa mga iro nga madakpan, wala usab sila’y sakyanan nga magamit paglibut-libot sa kabarangayan aron mangita sa mga laag nga iro. (BANAT NEWS)