Naghikog gamit ang bakus

CEBU, Philippines - Patay ang usa ka tawo nga gituohang naghikog pinaagi sa paghigot og bakus sa liog sa sitio Tower sa barangay Tawason, dakbayan sa Mandaue niadtong Martes sa gabii.

Ang namatay mao si Gilbert Codienera, 26, nagpuyo sa maong dapit nga nadiskubrehan sa iyang inahan nga si Lionesa nga nagbitay na sa sulod sa ilang lawak ug wa na maglihok.

Si PO3 Julius Tradio ug mga kauban sa kapolisan sa Presinto 6 sa Mandaue City Police Office (MCPO) miingon nga sa gihimo nilang imbestigasyon ilang nasuta nga naghambin og “nervous breakdown” ang namatay nga ilang gituohan nga maoy hinungdan sa paghikog niini.

Matud pa ni Tradio nga nag-inusara ang namatay sa sulod sa lawak ug walay nakamatikod sa gihimo niining paghikog.

Dugang pa ni PO3 Tradio nga ang mga sakop sa pamilya wala magduda nga may foul play sa kamatayon niini apan sa gihapon ilang gisugyot ang pagpaubos sa autopsy sa patay’ng lawas niini. (/EIM)(BANAT NEWS)