Mandaue duna nay tricycle regulatory board

CEBU, Philippines - Giaprobahan na sa konseho sa dakbayan sa Mandaue ang ordinansa nga magtugot ni Mayor Jonas Cortes pagmugna og Tricycle  Franchising and Regulatory Board (TFRB) nga pagatahasan sa paghan-ay og mga lagda alang sa mga traysikol.

Si Konsehal Elstone Dabon, tsirman sa committee on transportation sa City Council, maoy misugyot sa pagmugna sa maong ordinansa nga giaprobahan sa tanang sakop sa konseho.

Ang ordinansa giaprobahan atol sa regular session nga gihimo kaniadtong Lunes.  Gilatid sa ordinansa nga ang TFRB pangulohan sa mayor ug langkoban sa mga sakop gikan sa Land Transportation Office (LTO), city administrator, city prosecutor, director sa Department of Interior and Local Government (DILG), Traffic Enforcement Agency of Mandaue (TEAM), ang hepe sa kapolisan ug ang tsirman sa committee on transportation.

Ang operations chief sa TEAM nga si Edwin Ermac miingon nga ang mga sakop sa TFRB sa dakbayan maoy pagatahasan sa paghan-ay og mga lagda alang sa hapsay nga dagan sa mga traysikol nga magbiyahe sa dakbayan.

 Motan-aw usab kini aron dili maghinobra ang gidaghanon sa mga traysikol nga gihatagan og prangkisa  pagbiyahe isip mga pasaheroan sa dakbayan.

Matud ni Ermac nga ang sobra unya nga mga traysikol nga walay prangkisa maisip kini nga kulurom ug dakponon.

Si Ermac miingon nga ipatuman usab nila ang color coding scheme sa mga traysikol nga maoy maghatag sa mga traffic enforcer og kasayon sa mga kulurom nga mga traysikol nga namasahero panahon sa gabii.

Gitataw ni Ermac nga ubos sa color coding scheme ang mga traysikol nga namasahero adunay gihatag nga kaugalingon nga mga kolor sa ilang side car aron mailhan ang ilang mga rota.

Ang mga drayber kinahanglang mokolekta lang sa minimum nga plitehan nga ilatid unya sa bag-ong regulatory board ug aprobahan sa konseho.

Sa color coding scheme ang traysikol nga magbiyahe sa barangay nga nalahi na sa gitugot nga kolor dakpon na ug multahan. (BANAT NEWS)