TF Archival magpatabang sa US Homeland Security ug Interpol

CEBU, Philippines - Magpatabang unya sa US Homeland Security ug sa Interpol ang mga imbestigador sa kaso sa pag-ambush patay kang Atty. Noel Archival kun ugaling mapakyas ang National Bureau of Investigation sa pag-enhance sa video footages nga nakuha sa CCTV camera aron maklaro ang mga plate number sa sakyanan nga gigamit sa maong ambush.

Ang task group commander nga si Cebu City Police Office Provincial Director Sr. Supt. Noel Gillamac nagkanayon nga dili kaya sa PNP Cybercrime Group sa pag-enhance sa kopya CCTV footages.

Ang NBI mao na lang ilang gipaabot kun makaya ba sa ilang technical experts ang pag-enhance sa maong video tungod kay hanap gyud kaayo kini.

Pinaagi sa plate numbers masubay nila ang tag-iya sa maong sakyanan.

Pulong pa ni Gillamac nga dako kaayo og matabang sa kasulbaran sa kaso kun mailhan nila ang tag-iya niini. Gawas kang Archival, namatay sab ang iyang mga sakop nga sila si Candido Miñoza ug Alejandro Jayme ug miangol kang Paulo Cortes.

Si Gillamac miingon nga mibisita na sa ilang buhatan si Cebu City Councilor Nestor Archival ug nalipay siya sa dagan sa imbestigasyon.

Samtang ang NBI sab mibisita na sa buhatan ni Gillamac aron sa pagpahigayon nila og parallel investigation ug gi-share nila ang mga impormasyon nga ilang nakaylap.  (BANAT NEWS)