Adlaw’ng natawhan sa milagrosong pari gisaulog

CEBU, Philippines - Kagahapong adlawa mao ang ika-100 ka tuig nga kasumaran sa pagkatawo ni Monsenyor Teofilo Camomot, kinsa gituboy nga mosunod nga Bisayang Santo sama ni San Pedro Calungsod.

Si Msgr. Camomot natawo Marso 3, 1914 sa barangay Cogon, Carcar, Cebu isip ikawalong anak ni Luis Camomot ug Angela Bastida. Nabantog tungod sa iyang simple apan matinud-anon sa pagpuyo bisan siya nahimong dakong opisyal sa Simbahang Katoliko.

Daghang mga testimonya ang nag-ingong duna siya’y gasa sa "bilocation" tungod kay giingong dunay nakakita kaniya nga magmisa sa usa ka dapit apan sa samang higayon nagsangyaw usab sa laing lugar.

Ang “bilocation” mao ang pagkakita sa usa ka tawo sa duha ka managlagyo nga lugar sa parehong oras ug adlaw.

Duna say miingon nga aduna say gasa si Camomot nga makaayo og sakit pinaagi sa iyang pag-ampo, pagbasa sa kasingkasing sa usa ka tawo, ingon man "levitation" kon ang paglutaw sa hangin. Agi og paghandom sa sentinaryong adlaw sa iyang pagkahimugso sa kalibotan duha ka Santos nga Misa ang gipahigayon kahagapon sa buntag.

Si Arsobispo Jose Palma ang nangulo sa misa sa Daughters of St. Teresa didto sa Carcar ug laing  Santos nga Misa usab ang gipahigayon sa Sto. Tomas de Villanueva Parish sa Pardo, Cebu City diin nahimo siyang kura paruko sa tuig 1970 human siya natudlo isip auxiliary bishop ni Julio Cardinal Rosales.

Si Archbishop Emeritus Ricardo Cardinal Vidal una nang mipahibaw nga gisugdan na sa Vatican pinaagi sa Holy See ang unang ang-ang alang sa beatification ni Camomot.

Giordinahan pagkapari si Msgr. Camomot niadtong Disyembre 15, 1940 human mitungha sa Seminario de San Carlos dinhi sa Cebu.

Nahimo siyang kura paruko sa Sta. Teresa de Avila parish, Talisay City ug Titular Bishop of Clisma ug auxiliary bishop sa Jaro, Iloilo ug nadestino usab kaniadto sa Cagayan de Oro ug Misamis Oriental.

Usa ka aksidente sa sakyanan ang mitapos sa iyang balaanong kinabuhi dihang naaksidente ang iyang gisakyan sa San Fernando, Cebu niadtong paingon siya pauli sa Carcar. (/EIM) (BANAT NEWS)