Anak gipatay, papa naghikog sab

CEBU, Philippines - Patay ang singko anyos nga bata human giingong gipusil patay sa gipasanginlan nga adik niyang amahan kinsa nagpakamatay usab pinaagi sa pagpusil sa iyang kaugalingon diha sa ilang balay sa barangay San Vicente, lungsod sa Liloan alas-4 pasado ang takna sa hapon niadtong miaging Domingo.

Ang bata mao si Francis James Villamor samtang ang suspetsado nga  amahan nga nagpakamatay usab mao si Fritz Villamor, 37,  giingong kanhi drayber ni Mayor Duke Frasco nga kapin usa ka tuig na nga natangtang sa trabaho.

Si  SPO3 Marcelino Servilla, imbestigador sa kapolisan sa maong lungsod miingon nga ang silingan sa manag-amahan nga si Niño Pilapil mitug-an kanila nga nadunggan pa niya ang suspek nga midanguyngoy paghilak.

Sunod nga nadungog ang sipang mga buto sa armas gikan sa balay sa duha hinungdan nga iyaha kining gisusi.

Sumala pa nga nagbuy-od na ang duha diha sa sawog nga pulos dunay mga samad pinusilan sa ulo ug naligo na sa ilang kaugalingong dugo.

Matud pa ni SPO3  Servilla nga dunay samad pinusilan sa ulo ang bata ug ang amahan niini nakabaton sab og samad pinusilan gikan sa walang tampihak sa iyang ulo nga milapos sa tuong tampihak niini.

Base sa mga pagpangutana sa mga imbestigador ilang nasuta nga walhon ang suspek. Ang armas nga usa ka rebolber nakuha diha sa walang bahin sa iyang lawas.  Matud pa ni Servilla nga usa ka .9mm paltik nga revolver ang nakuha diha sa crime scene nga dunay duha ka basiyo sa tambor niini , usa ka mikagar nga bala ug duha ka mga slugs  nga gituohang milapos gikan sa ulo sa mga biktima. Si Servilla midugang nga base sa mga impormasyong ilang nakuha sa mga kabanay sa mga biktima, mag-usa na ka buwan nga gibiyaan sa asawa ang suspek.

Giingong mireklamo ang asawa niini tungod kay pirme lang silang mag-away tungod kay magsige kini og selos.

Samtang sa report sa GMA News Balitang Bisdak kagahapon, ang igsuong babaye ni Villamor mibasol sa illegal nga drugas maoy nakaingon nga naingon-adto ang iyang igsuon. (/EIM)(BANAT NEWS)